HEKAYƏLƏR

Heç kimə danışma

Dəvəsi ilə səhrada gedən sarvan yerindən tərpənə bilməyən və susuzluqdan öləcək halda olan bir nəfərə rast gəlir.

Susuzluqdan yanan həmin adam Allah rizası üçün su istəyir. Dəvə sahibi yerə düşüb kişiyə su verir. Suyu içib özünə gələn adam onu itələyir və dəvəyə minib çapmağa başlayır.

Dəvə sahibi onun arxasınca qışqırır:
 
- Get, amma səndən bir xahişim var. Bu barədə heç kimə danışma.

Bu xahişi mənasız hesab edən oğru təəccüblənir və səbəbini soruşur.

- Nə etdiyinizi danışsanız, ağızdan ağıza hər yerə yayılacaq və insanlar səhrada ehtiyacı olan birini görəndə kömək etməyəcəklər.

Etdiyimiz yaxşılığa pisliklə cavab versələr belə, köməyə ehtiyacı olan sonrakılar üçün xeyirxahlığı davam etdirmək lazımdır. Şər işlər də yaxşı kimi yoluxucudur.